मिडियाको चिरफारः केही सामाजिक सन्दर्भ

विषम छ समाज । समाजभित्र धनी - गरिब, तँ- म, उचनीच, जातपात छ । त्यसैले अन्याय छ, शोषण छ, पीडक छन्, पीडित पछि छन् । भेदभाव छ । खाडल छ । यी खाईहरु, यी विभेदहरु मेटिनु पर्छ, कम गरिनु पर्छ भन्नेमा मतैक्य छ । तर, झनै बढ्दै छ दूरी; हुने र नहुनेबीच । यिनै असमानताहरुले जन्म दिएका छन् यावत सामाजिक समस्याहरु । मिडियाले यी सामाजिक सवालहरुलाई कसरी हेरिरहेको छ, कसरी आफूलाई प्रस्तुत गरिरहेको छ भनेर खोतलेर हेर्ने प्रयास हो ।

चार सामाजिक इश्यु - वातावरणीय न्याय, गरिबी, एचअइभी/ एड्स र महिला जीवनवृत्तिबारे नेपाली छापाका सामग्रीहरुको प्रक्रियाबद्ध चिरफार गरिएका पाँचवटा लेख पुस्तकमा परेका छन् । सबै लेखमा सम्बन्धित विषयमा छापिएका सामग्रीहरुका आधारमा छापाका सबल र दुर्वल पक्षहरु केलाइएका छन् ।

प्रक्रियाबद्ध अध्ययन र टिप्पणीका यस्ता प्रयासले फस्टाउँदो मिडिया क्षेत्रलाई अझ बढी सबल र सक्षम तुल्याउने छ भन्ने विश्वास गरिएको छ । उल्लिखित विषय तथा मिडियामा रुचि र चासो राख्ने सबैलाई पुस्तक उपयोगी छ ।

प्रत्यूष वन्तले इतिहासमा विद्यावारिधि गर्नु भएको छ । उहाँको सम्पादन/सह-सम्पादनमा छापामा महिला,  नेपाली मिडियामा दलित तथा जनजाति, छापामा दलित, छापामा जनजाति, मिडियाको अन्तरवस्तुः विविध विश्लेशण, स्थानीय रेडियो, क्षेत्रीय मिडिया र नेपाली मिडिया सन्दर्भ ग्रन्थ प्रकाशित छन् ।

 

तथ्यांकशास्त्र/समाजशास्त्रमा स्नातकोत्तर गर्नुभएका रमेश पराजुली अनुसन्धाता हुनुहुन्छ । उहाँको सम्पादन/सह-सम्पादनमा मिडियाको अन्तरवस्तुः विविध विश्लेशण पुस्तक प्रकाशित छ।
 

समीक्षा	प्रकाशित	प्रकाशित मिति
मिडियामाथि संयुक्त आलेख	राजधानी (सौजन्य) पृष्ठ 'ख'	१३ भदौ, २०६०