सुदूरपश्चिममा पत्रकारिता

समाजका अरु विभिन्न क्षेत्र जस्तै काठमाडौं केन्द्रित छ नेपाली पत्रकारिता । यद्यपि पत्रकारिताको अभ्यास काठमाडौंबाहिरका क्षेत्रका लागि पनि नयाँ भने होइन । यसै सन्दर्भमा सुदूरपश्चिमाञ्चल क्षेत्रका पत्रकारिताको परिवेशबारे चर्चा गर्ने क्रममा तयार भएको पुस्तक हो ।

पत्रकारिताको समष्टिगत राष्ट्रिय इतिहासमा सुदूरपश्चिमको योगदानको स्थान यस पुस्तकमार्फत खोजिएको छ । यस क्षेत्रको पत्रकारिताको पृष्ठभूमि , शुरुआत र विकासक्रमको सिलसिलेबार प्रस्तुति यसमा समावेश गरिएको छ । वर्तमान अवस्थामा पत्रकारितामा देखिएका विकृतिहरुको प्रसङ्ग पनि उठाइएको छ । विषयवस्तुको दृष्टिकोणले पूर्णता प्रदान गर्ने, प्रामाणिक बनाउने, तथा पत्रकारिताको गुण, दोष, स्वभाव र प्रतिफललाई तटस्थ भई परीक्षण गर्ने प्रयास भएको छ ।

सुदूरपश्चिमको पत्रकारिको विगत र वर्तमान जान्न चाहने र यस क्षेत्रबारे सामाजिक अध्ययन गर्न खोज्नेका लागि यो पुस्तक उपयोगी छ । साथै नेपाली पत्रकारितामा रुचि राख्ने सबैका लागि सहयोगी छ ।

डा‌ देवीप्रसाद ओझाले ३० वर्षको सरकारी सेवामा प्रमुख जिल्ला अधिकारी लगायत विभिन्न महत्वपूर्ण ओहदामा रही सेवा पुर्‌याइसक्नु भएको छ । २०१४ सालदेखि साहित्य रच्न थाल्नु भएका ओझा २०२२ सालदेखि निरन्तर पत्रकारितामा संलग्न हुनुहुन्छ । उहाँका कोतपर्व खण्डकाव्य (२०२१); समसामयिक चिन्तन (२०४६); डोटी क्षेत्रको इतिहास संस्कृति (२०४९); शहीद दशरथ चन्दको जीवनी (२०५१); कैलाश मानसरोवर यात्रा (२०५३) र सुदूरपश्चिममा २००७ सालको क्रान्तिको इतिहास (२०५७) पुस्तक प्रकाशित छन् ।